Arraianos premia o traballo pola lingua de Estraviz
Publicado: 17 Sep 2015, 17:10
A Asociación Cultural “Arraianos” concedeu o Premio Arraiano Maior 2015 ao lexicógrafo Isaac Alonso Estraviz. A entrega do galardón realizarase ás 5 da tarde do próximo sábado, 19 de setembro, na capela da Nosa Señora do Xerés, en Lobios, onde previamente se vai celebrar un xantar de confraternización. A asociación organizadora do evento destaca o lexicógrafo como «persoa de ben, referente ético e comprometido coa cultura e o territorio arraiano» e salienta o seu «traballo sen descanso» para que o galego recupere o seu esplendor. Parte fundamental dese labor é o dicionario que leva o seu nome, publicado orixinalmente en papel e, desde hai máis dunha década, tamén na internet. O e-Estraviz, o máis completo dos dicionarios galegos con 130.666 entradas totais, recibiu 474.904 consultas nos últimos doce meses.
http://radiofusion.eu/manager.php?p=FichaNova&ID=17910