Quero colocar umha engádega, que é pergunta também, ao meu comentário anterior sobre Montecelo/Montezelo, igualmente válida para o caso do plural Montecelos/Montezelos; trata-se de que na toponímia existe a variante Monticelo (com apenas mera alternáncia fonética), que esquecera comentar na anterior. Ora bem, o Nomenclator de Galicia da Xunta uniformizou, penso que com bom critério, todas as formas para Montecelo; a pergunta é se nos apelidos se tem registado algum da variante Monticelo(s). Em concreto, o eu-naviego da freg. de Parámios (A Veiga ou ant. Veiga de Riba d'Eu) é oficialmente Monticelo, ao nom estar afecto polos acordos da Comissom de Toponímia da Xunta de Galicia. Eu nom disponho dos dados, nem sequer da agenda telefónica de Astúrias, mas é possível que nela se ache algum Monticelo.
Umha cousa mais: o moderador comenta, no início da secçom deste apelido, que em Portugal nom se topam apelidos Montecelo. Logicamente, já que alá só se acharám com a grafia Montezelo, onde o "z" é a grafia correspondente ao infixo preciso na formaçom do diminutivo, com "c" no galego normativizado. Enriquecerá a secçom se se introduzir tal matizaçom. Nom deveríamos esquecer que, em grande parte dos topónimos, como no resto do córpus lingüístico geral , o mesmo vocábulo (com igual origem, significado, etc.) existe a umha banda e outra da raia, mudando apenas em ocasioes a fonética e/o a grafia, que no portugués é mais etimológica.
