Historia institucional
A Casa Grande da Riva (San Estevo de Pantiñobre, Arzúa) inicia a súa andadura a comezos do século XVI, se ben o incremento de patrimonio chegará a finais do século da man de Juan Vázquez de Aguiar, que renuncia á herdanza do seu pai, Jácome González de Aguiar, para quedarse coa da súa nai Antonia Vázquez do Barreiro. Irá, así mesmo, comprando as lexítimas dos seus irmáns e tíos para reagrupa-lo patrimonio familiar. Pero será Mariana de Aguiar e Gayoso, filla de Juan Vázquez, quen fundará un vínculo para manter unidos tódolos bens herdados.
A súa descendente, María Josefa Benita de Aguiar Montenegro y Lema casou con Joseph Ozores Sequeiros Sotomayor, Conde de Priegue, no século XVIII, enlazando a súa familia coa condal, se ben non todo o seu patrimonio, que herda o seu irmán Manuel José de Aguiar Montenegro y Lemos, sucesor no vínculo e morgado fundado pola súa antepasada Mariana de Aguiar.
NOTA: Artigo recollido do Arquivo do Reino de Galiza. Os fondos desta Casa están depositados no devandito arquivo.
