Historia institucional
A finais do século XVI a Casa de Xaz (San Martiño de Dorneda, Oleiros), pertence a Pedro Montoto, que manterá o seu patrimonio unido por un vínculo que levará en herdanza a súa descencente María Montoto de Figueroa, quen casa co Señor de Friol, Francisco Núñez de Prado y Ulloa, herdando ambas casas o seu fillo Antonio de Prado Montoto y Figueroa.
A mediados do século XVIII a casa de Xaz, xunto coa xurisdicción de Friol, o couto de Pol, Portomarín, Vilar de Cas e outras, pertencen a Álvaro Antonio de Losada y Prado. O seu descendente Francisco Javier Losada y Pol, casado con María Joaquina Miranda Gayoso Sebastián y Ramos, aparece xa en 1800, ademais de como herdeiro destas casas, como Conde de San Román e Marqués de Santa María do Vilar.
É a súa filla María del Pilar Losada y Miranda quen casa con Antonio Ozores Varela, Conde de Priegue, vencellando a casa de Xaz ó condado, que herdará o seguinte conde Francisco Javier Ozores Losada.
NOTA: Artigo recollido do Arquivo do Reino de Galiza. Os fondos desta Casa están depositados no devandito arquivo
