Historia institucional
O vínculo da Penela foi fundado o 18 de agosto de 1598 por Juan Romero Bermúdez de Rioboo, dono da Casa e Fortaleza da Penela, sita en San Pedro de Silvarredonda, municipio coruñés de Ponteceso. A tódolos bens da Penela hai que suma-los que víncula o 11 de xullo de 1620 a súa dona, Constanza Gómez de Leis, bens que pasan ó seu fillo, Lorenzo Bermúdez de Castro, por morte do seu irmán Francisco.
Este Lorenzo Bermúdez de Castro, casado con María de Leis, é o pai de Carlos Bermúdez de Castro quen, a mediados do século XVII, casa con Andrea Becerra Villardefrancos, herdeira do vínculo de Anceis, fundado polo seu pai, Juan Becerra de Piñeiro, o 24 de maio de 1650. Será o seu fillo, Andrés Bermúdez de Castro, quen reúna na súa persoa ámbalas dúas casas que, a partires deste punto, van sempre unidas. O seu fillo, José Ventura Bermúdez de Castro, morreu (en 1736) sen descendencia, deixando como herdeira do vínculo á súa tía Francisca Bermúdez e Castro, dona da Casa de Fontán, casada con Benito Sarmiento Valladares, dono da Casa de Baión.
Desta rama xurde Juan Manuel Varela Sarmiento quen, xa en 1743, aparece como dono da Penela, Anceis e Fontán, que casa con Nicolasa Freire de la Concha, dona e señora de Fisteus.
É a neta de Juan Manuel e Nicolasa, María Pastoriza Varela Sarmiento, a que une todo o patrimonio da Penela, Anceis, Fontán, Fisteus e outras ó condado de Priegue, co seu matrimonio con Juan Nepomuceno Ozores Silva Sequeiros Sotomayor, Conde de Priegue xa en 1789.
NOTA: Artigo recollido do Arquivo do Reino de Galiza. Os fondos desta están depositados no devandito arquivo.
